ILOILO CITY – Wala na ginpadayon pa sang Police Regional Office 6 (PRO 6) ang pagpadala sang mga pulis agud magpatigayon sang augmentation sa Police Regional Office 11 (PRO 11) agud magbulig sa pagserbe sang arrest warrant batok sa lider sang Kingdom of Jesus Christ nga si Pastor Apollo Quiboloy.
Sa interview sang Bombo Radyo kay Police Lt. Col. Arnel Solis, spokesperson sang PRO 6, iya ginpahayag nga ang nasambit nga desisyon ang kasunod man sang pagpagwa sang Davao City Regional Trial Court Branch 15 sang temporary protection order.
Katuyuan sini nga pauntaton ang Philippine National Police sa pagpatuman sang mga tikang nga magaresulta sa pamahog sa kabuhi, kahilwayan, seguridad kag propedad sang mga miyembro sang Kingdom of Jesus Christ sa Davao City.
Suno kay Solis, ang mando nga indi anay pag-ipadala ang mga pulis halin sa Western Visayas padulong sa Davao City ang halin mismo sa national headquarters.
Sa tion naman nga bawion ang mando, nakahanda ang 100 nga mga pulis nga ipadala sa Davao City.
Ang nasambit nga mga pulis ang magahalin sa Iloilo Police Provincial Office kag Iloilo City Police Office.
