Naubos na sa sulod lamang sang halos tatlo ka oras ang tickets para sa una kag ikaduha nga adlaw sang concert sang P-pop girl group nga BINI.
Bangud sold-out na ang tickets online, gin-anunsyo sang organizers kag music label nga Star Music nga indi na lang pagpadayunon ang general public selling subong kuntani nga Agusto 31.
Ang “Grand BINIverse” concert ang patigayunon sa Nobyembre 16 kag 17 sa Smart Araneta Coliseum sa Quezon City.
Sanday Mikha, Aiah, Colet, Maloi, Gwen, Stacey, Jhoanna, kag Sheena ang nagabug-os sa BINI nga nag-debut sang 2021 sa single nga “Born to Win.”
Kilala man sila sa ila hit songs nga”Na, Na, Na,” “Huwag Muna Tayong Umuwi,” “Lagi,” “Pantropiko”, “Salamin, Salamin,” “Cherry on Top,” kag iban pa.
Sang Hunyo, nangin madinalag-on man ang three-night concert sang Bini sa Quezon City nga amo ang “BINIverse.”
Nakahimo man sila sang maragtas sang Hulyo bilang una nga P-Pop group nga nag-perform sa KCON LA 2024 particular sa “M Countdown Pre-Show” sa Crypto.com Arena sa Los Angeles, California.
