Gina-imbestigaran sang Philippine National Police (PNP) ang reports kaangot sa local government executives nga gina-alegar may kahilabtanan sa distribusyon sang iligal nga droga bilang paagi sang pagtipon sang pondo para sa midterm elections sa 2025.
Suno kay PNP Drug Enforcement Group (PDEG) director Brig. Gen. Eleazar Matta, may summary na sila sang impormasyon nga subject para sa validation matapos nga nakakuha sang intelligence reports.
“We are validating and conducting intelligence operations against those local government executives involved in the distribution or proliferation of illegal drugs in our country,” suno kay Matta sa isa ka news briefing sa Camp Crame, Agusto 30.
Suno pa sa natungdan, may informant nga nagsugid sa PDEG nga may isa ka alkalde sa watch list nga nagbakal sang tatlo ka kilo ka shabu sa kada duha ka semana kag amo ini ang ginadul-ong sa komunidad.
“Our informant has positively identified this mayor,” pahayag pa ni Matta.
Ginklaro sini nga ang lista sang PNP ang separado sa narcotics list nga iya anay ni former President Rodrigo Duterte.
Nagpamalibad na ini nga maghatag sang ballpark figure sa numero sang local politicians nga gina-monitor apang nagsiling nga kadam-an diri amo ang mayors kag ila associates.
“There are mayors, or protégés of local politicians identified with the mayor,” pahayag sini.
Gindugang sini nga magluwas sa executives nga na-report nga halin sa mga banwa kag probinsya, may yara man mismo nga nagikan sa National Capital Region (NCR)
Ginalantaw man sang PDEG nga magluwas sa palaabuton nga eleksyon, ginahandaan man sang mga drug syndicate ang Yuletide season kun sa diin ginalauman na nga mas magagasto sang daku ang mga tawo.
Hugot man ang pagbantay sang police unit sa bag-o kag mas barato nga bersyon nga ginapahayag nga gina-introduce subong sang drug syndicates halin sa China.##
