Napuno sang pagpanginbulahan ang seasoned actress nga si Arlene Muhlach matapos ginpakigbahin sini ang maayo nga balita kaangot sa iya pagtapos sa Bachelor of Arts in Communication sa Philippine Women’s University.
Ginpakita sang 55-anyos nga aktres ang iya graduation photo amo man ang mga laragway sa seremonya sa Philippine International Convention Center (PICC).
Pahayag sini, nag-untat siya sang una sa ikatatlo na kuntani nga tuig sa kolehiyo agud nga pasulabihon ang iya showbiz career kag pamilya.
Subong, napamatud-an sini nga malab-ot sini ang iya handum apisar sang iya edad.
“Proving that it is never too late to fulfill a longstanding goal, I now have a degree in Bachelor of Arts in Communication from Philippine Women’s University,” pahayag sini.
Ginpasalamatan sini ang iya professors kag blockmates sa Expanded Tertiary Education Equivalency and Accreditation Program (ETEEAP) bangud sa ila pagsalig sa iya abilidad.
Malipayon man si Arlene sa suporta sang iya bana kag kabataan amo man ang pasensya sang iya office mates sa Internal Revenue Services department sang Commission of Appointments.
“Age is just a number, determination and passion are what truly matter,” kabahin sang mensahe sang aktres.
Lakip sa nag-congratulate sa iya amo sanday Gelli De Belen, Ruffa Gutierrez, Lara Quigaman, Nadia Montenegro, Rita Avila, kag Edu Manzano.
Si Arlene nga utod ni Aga Muhlach ang kilala sa shows kag mga pelikula kaangay sang “A Love to Last,” “Pangako Sa’yo,” “May Bukas Pa,” kag“Walang Hanggan.”
