Isa sa pinaka-ginahadlukan sang tawo nga sapat amo ang buaya.
Tuman ka makatululublag ang mga balita kaangot sa mga lawas nga ginapangtulon sini nga sapat kag kun ikaw makakita sini, pat-od nga mapaspas ka gid sang dalagan.
Apang paano kun pagbugtaw mo, makit-an mo nga naga-‘chill chill’ ang buaya sa imo balay?
Amo sini subong ang sitwasyon sa syudad sang Vadodara sa state sang Gujarat sa India.
Natabo ini matapos nga naglapaw ang tubig sa suba kasunod sang sunod-sunod nga inadlaw nga mabaskog ang ulan sang nagligad nga semana.
Ang Vishwamitri River nga nagalaba sang 17-kilometros amo ang puluy-an sang ginatos ka freshwater crocodiles.
Ang mga tawo nga nagapuyo sa baba sang suba ang naanad na nga may mga buaya gid man nga nagapalapit malapit sa dalan sa tion sang monsoon season, apang lain pa gid ang sitwasyon subong nga tuig bangud magluwas nga nagdamo sila, mas nagpalapit pa gid ang mga ini sa residential areas.
Sang Agusto 27-29, masobra 20 sa ila ang gindakop sang otoridad samtang yara sa mga kabalayan.
Ang pinakagamay ang nagalaba sang duha ka tapak samtang ang pinakadaku naman ang nagalaba sang 14 ka tapak suno sa Vadodara Range Forest Office.
Halin sang nagligad nga semana, wala sang halos makatulog sang maayo bangud sang mga buaya nga nagakamang sa dalan, nagasaka sa mga atop sang balay, nagalangoy sa mga kanal malapit sa mga balay samtang may ginapang-it nga sapat kaangay sang ido, kuring… kag bisan baka!
Tubtub subong, ginapaaligmat ang mga tawo sa pamahog nga dala sini nga mga sapat samtang padayon naman ang otoridad sa pagsipot sa ila.#
