Indi mahibal-an sang publiko kun maham-ot ukon mabukal ang dugo bangud sa nagalagaw subong nga pictures kun sa diin nakit-an si dismissed Bamban, Tarlac Mayor Alice Guo nga todo-yuhom kag wala-tuo ang pose kaupod ang mga opisyal sang Pilipinas nga amo ang magadala-pauli sa iya matapos nadakpan ini sang otoridad sa Indonesia subong nga semana.
Lakip sa talalupangdon nga laragway amo ang “groupfie” ni Guo kag National Bureau of Investigation (NBI) kag Bureau of Immigration (BI) escorts nga kaupod niya sa salakyan.
Madamo nga netizens ang nag-react bangud daw ‘chill’ lang si Guo kag ang mga nagsugat sa iya nga daw kaangay nga isa lang ka road trip ang ila ginahimo.
“Hanep parang mag outing lang ah”; “Ako nabwibwisit para sa mga Indonesian na ginulo natin lol. Pinakawalan natin, hahanapin nila, pag-balik sa’tin, selfie-selfie lang na parang papuntang team building”; “Something is very, very wrong with this picture,” kabahin sang mga komento.
Wala pa dira natapos.
Ginsundan pa ini sang picture nga yara si Guo sa tunga ni Department of the Interior and Local Government (DILG) Secretary Benhur Abalos kag Philippine National Police (PNP) chief General Rommel Francisco Marbil.
Naka-peace sign pa ang dismissed mayor kag pareho sila nga all-smiles samtang nagapungko sa couch.
Ini nga pictures ang magluwas pa gid sa nalantaw mismo sa videos sang gin-turn over si Guo sang Indonesian authorities sa Philippine officials.
Sang oras nga ginsumalang sini si Abalos, kabahin sang pagtamyaw ni Guo amo ang: “Hi, Sec… (pangamusta) Nagkita na ‘po tayo before. Sa Tarlac po…. Sec, patulong, may death threat po kasi ako.”
Sunod man nga nagpaguwa sang pahayag si Senator Risa Hontiveros matapos naglalapta ang amo nga pictures: “PAALALA lalo na sa mga kawani ng gubyerno: Si Alice Guo ay pugante. May kasong human trafficking. Hindi po ‘yan celebrity.”
Nahibaluan nga si Guo nga ginbulgar man sang NBI nga amo ang Chinese national nga si Guo Hua Ping ang gina-angot sa iligal nga Philippine Offshore Gaming Operators (POGOs).
Samtang mainit ang pangalan sini sa pungsod bangud sa imbestigasyon sang Senado kag mga ahensya sang gobyerno, naglayas siya sa Pilipinas kaupod ang iya mga utod nga si Sheila kag Wesley Guo kag si Cassandra Li Ong sang Hulyo 2024.
Una nadakpan sanday Sheila kag Ong sa Batam, Indonesia sang Agusto 20 kag gindala-pauli diri sa Pilipinas sang Agusto 22.
Miyerkules sang kaagahon naman sang naaresto si Alice Guo sa Tangerang City samtang ginapangita pa ang utod sini nga si Wesley.
Lakip sa pending criminal complaints batok kay Alice Guo sa Department of Justice amo ang qualified human trafficking, tax evasion, kag money laundering.
Sini lang nga adlaw, nagpaguwa naman ang Tarlac Regional Trial Court Branch 109 sang arrest warrant batok sa dismissed mayor kaangot sa kaso nga graft partikular sa paglapas sa Section 3(e) kag 3(h) sang Republic Act 3019 ukon ang Anti-Graft and Corrupt Practices Act.#
