Kun ikaw may ka-relasyon, mahangpan mo gid kun ano ka-importante ang pag-update sa isa kag isa kada adlaw.
Apang nakaagi ka na bala nga feeling mo daw na-harass ka na bangud sa sobra-sobra nga pagpanawag nga daw indi na gid insakto?
Amo ina ang nabatyagan sang isa ka 31-anyos nga babaye Amagasaki sa Hyogo Prefecture sa Japan.
Nagsugod ini sang nagligad nga Hulyo subong nga tuig sang nakabaton siya sang masobra 100 ka tawag kada adlaw halin sa isa ka tawo nga wala man gani nagahambal.
Puerte nga kulba ang nabatyagan sang babaye bangud sa makatilingala nga tawag, kag ginahulat man siya sang caller nga patyon ang tawag apang maga-call man ini gihapon liwat sang sulit-sulit. Lain-lain kag anonymous ang phone number kag indi ma-block sang babaye.
Sang ulihi, nagsobra na ini sa isa ka bulan, kag nag-amat-amat siya sa pagsuspetsa bangud ang tion lamang nga wala naga-tawag ang stalker amo kun naga-higda na siya sa kuwarto kag kun naga-uyat siya sang cellphone sang iya bana agud maghampang sang video games.
Indi na gid siya makaagwanta kag gindangop niya sa pulis ang reklamo tubtub nga sini lang nga Septyembre, nakumpirma ang iya pagpang-duha-duha kasunod sang imbestigasyon sang otoridad.
Sunod nga gin-aresto ang 30-anyos sini nga bana bangud sa paglapas sa anti-stalker law sang Japan.
Sang gin-usisa siya kun ngaa gin-harass niya ang asawa paagi sa tawag, simple lang ang sabat sang lalaki nga palangga niya ang iya asawa gani nag-call siya nga wala man sang ginahambal.
Nahibaluan nga common man sa Japan nga lain-lain ang balay sang kasado nga mga indbidwal ilabi na kun malayo ang trabaho, apang ini ang una nga tion nga may na-rekord ang pulis sa Amagasaki nga naghimo pa ang bana sang phone stalking apisar nga updanay man sila sang iya asawa sa sulod sang balay.
