Nagdaog ang former world champion nga si Jerwin Ancajas sa iya comeback fight sa atubang sang Pinoy fans matapos na-disqualify ang kasumpong sini nga si Sukpraserd Ponpitak sang Thailand sa ika-lima nga round sang ila featherweight bout.
Natabo ang sambuwa sa Mandaluyong City College Gym nga co-main event sa Manny Pacquiao: Blow-by-Blow kagab-i, Septyembre 22.
Si Ancajas nga longtime former International Boxing Federation (IBF) minimumweight champion ang dominante na sa nauna nga rounds kag gintumba pa ang Thai boxer sa imbukada nga round paagi sa iya left hook.
Dalayon nga ginpa-untat sang referee ang hampang matapos ang dos minutos kag 34 segundos sa ika-lima nga round bangud ginatulod na paidalom sa canvas sang kasumpong ang Pinoy boxer nga isa na ka paglapas sa pagsulundan sang boxing.
Antes ginpauntat ang hampang, nabuhinan man sang puntos si Ponpitak sa third round bangud sa amo man sini nga hulag.
Apisar nagdaog, wala nakit-an nga nag-selebrar ang 32-anyos nga Filipino boxer bangud sa resulta sang hampang.
Desidido kuntani ini nga makabawi kag tumbahon gid ang kasumpong matapos ang iya makakilibot nga kalutusan batok kay Takuma Inoue sa Japan sang Pebrero subong nga tuig.
Nagsaka na subong sa 35-4-2 ang iya record nga may 23 knockouts, samtang ini naman ang ika-20 nga kalutusan sa karera sang Thai.
Ini nga hampang amo man ang featherweight debut ni Ancajas matapos pila ka beses nga nabudlayan sa iya bug-at sa pila ka matches sa super flyweight kun sa diin siya ang nangin IBF world champion halin 2016 tubtub sang 2022.
Nagaplano naman ang longtime trainer sini nga si Joven Jimenez kag ang MP Promotions head nga si Sean Gibbons nga mag-arrange sang hampang para kay Ancajas sa Disyembre.#
