Gintugyan sang pito ka mga ginaalegar nga cohort ni dismissed Bamban, Tarlac Mayor Alice Guo ang ila nga kaugalingon sa mga otoridad.
Suno sa kay National Bureau of Investigation (NBI) Director Jaime Santiago, lima ang nagsungka sa NBI Central Luzon samtang duha naman ang nagsungka sa NBI Task Force Alice Guo.
Ginpahayag man sini nga sila ang responsable bilang mga Hongsheng incorporators kag Zun Yuan incorporators kon sa diin, gintumod man sini nga ini tanan ang mga peke nga korporasyon ni Alice Guo.
Sang nagligad nga semana, ang Pasig Regional Trial Court Branch 167 nagpaguwa sang mga warrant of arrest batok sa pila ka mga kaupod nga akusado ni Guo sa iya qualified trafficking case.
Apat sa mga nagsungka ang subject sang arrest warrants, samtang ang kwalipikado sa kaso sa trafficking ang indi na mahimo nga mapiyansahan.
Suno sa isa sa mga nagsungka, legal ang negosyo sang nadalahig ini, dugang pa nga siya mismo ang una nga nag-coordinate sa Philippine Amusement and Gaming Corporation (PAGCOR).
Ginklaro niya sang ulihi nga nagahambal siya para sa iya kaugalingon kag indi para sa iban.
Samtang, ginpahayag ni Santiago nga hulaton sang NBI ang commitment order halin sa Pasig Court.
Una na diri nga ginsaylo si Guo sa Pasig City Jail Female Dormitory gikan sa PNP Custodial Center sa Camp Crame, Quezon City
Nagapangatubang man si Guo sang kaso nga graft subong man sang reklamo sa money laundering.
