May kilala ka bala, ukon ikaw mismo, naga-eksperyensya sang sleepwalking?
Delikado ini bangud nagakatulog ka gihapon apang nagabangon ka kag maglakat… kag kun kaisa nagakabunggo ka pa.
Ginatawag man ini nga somnambulism, ginaangot sang researchers sa genetics, masami nga nagakatabo sa mga bata, apang nagakadula man kun magdalagku na sila.
Sa Estados Unidos sang Amerika partikular sa state sang Louisiana, may yara sang isa ka 10-anyos nga bata nga malayo ang nalab-utan bangud sa iya paglakat samtang nagakatulog.
Natabo ini kay Peyton Saintignan nga na-report nga nadula alas dies sang nagligad nga gab-i.
Nangayo na sang bulig ang mga ginikanan sini kag indi lamang ang Louisiana State Police ang nagpangita kundi ginatos na ka mga volunteer agud nga pangitaon kun sa diin ayhan nakalab-ot ang bata.
Lakip sa nagbulig amo ang drone operator nga si Josh Klober nga nagbyahe pa halin sa Arkansas pakadto sa Louisiana agud nga makabulig lang nga matultulan ang bata gamit ang iya drone.
Nalakip ang thermal imaging camera sa iya drone, kag samtang naka-set up ang mga gamit, madamo man ang nagalantaw sa flat screen TV.
Pasado na alas onse sang nakit-an ang bata nga nagabarikutot sa duta, wala na ang isa ka tsinelas, kag yara sa sulod sang kagulangan samtang mahamuok gihapon ang tulog.
Tuman ang kalipay sang pamilya nga nakita ang bata, kag sang ginpukaw ini kag gin-check, nakit-an nga nakagat lang ini sang lamok kag wala na sang iban pa nga samad sa lawas.
Suno sa pamilya, masami gid man nga naga-sleepwalk ang bata apang ini ang una nga bes nga nakaguwa na ini sa balay kag yara na sa tunga sang kagulangan samtang mahamuok gihapon ang katulugon.
Ang pag-sleepwalk masami nagakatabo isa tubtub duha ka oras matapos nga matulugan ang isa ka tawo.
Apisar nga ginaangot ini sa genetics ukon sulundon sa pamilya, ginaangot man ini sa pila ka mga rason kaangay sang stress, sleep deprivation, sleep schedule disruptions, brain-related diseases, kag mangin ang pila ka medications.
