Nagpangabay ang Commission on Elections (COMELEC) sa mga naga-file sang ila mga certificate of candidacy sugod subong nga Martes nga palawigon ang ila pasensya.
Ginpahayag ni Comelec Chairman George Garcia nga madamo na sang mga kandidato ang naglinya sa guwa sang opisina sang Comelec antes pa man mag-umpisa ang 8 a.m filing sang COCs.
Suno kay Garcia, ang iban nga kandidato ang nagdala pa sang mga marching band agud hatagan sang masadya nga atmosphere ang pag-file.
Gindugang man sini nga kontani ang mga kandidato kag ang ila mga supporters ang magkoordinar sa COC filing kag indi magtuga sang kainit sang ulo kag kaakig sa posible mangin resulta sang piniliay.
Nahibaluan nga ang pungsod nagasulod na sa bag-o nga election season samtang nagasugod man ang pag-file sang candidacy para sa 2025 elections.
Ang poll body nagtukod man sang mga satellite offices para sa pag-file sang COCs sa pila ka bahin sang Mindanao bangud man nga ang pila ka kandidato ang indi makakadto sa pila ka lugar nga kontrolado sang isa pa ka kandidato.
Gintumod man sang COMELEC chief nga wala siya nag-ekspektar nga madamo nga mga kandidato ang maga-file sang ila COC sa una nga adlaw bangud ang iban nga mga kandidato nagapangusisa pa sang ila mga potensyal nga kasumpong sa eleksyon.
Nagpasalig naman ang natungdan nga ginapabaskog sang COMELEC ang ila mga preparasyon sa seguridad para sa pag-file.
Yari naman ang mga elective positions nga pagabotohan sa Mayo 12, 2025 nga eleksyon:
- Senators – 12
- Party-List Representatives – 63
- Member, House of Representatives – 254
- Governor – 82
- Vice Governor – 82
- Provincial board member – 800
- City Mayor – 149
- City Vice Mayor – 149
- City councilor – 1,690
- Municipal Mayor – 1,493
- Municipal Vice Mayor – 1,493
- Municipal councilor – 11,948
- BARMM Members of the Parliament – 25
- BARMM Party Representatives – 40
- TOTAL: 18,280
