Nag-protesta ang Vietnam batok sa China matapos ginaalegar ginkastigo kag ginkawatan sang mga Chinese ang 10 ka mga manugpangisda nga Vietnamese tatlo ka adlaw na ang nagligad samtang sila ang nagapangisda sa Hoang Sa ukon Paracel Islands.
Suno sa Vietnamese foreign ministry, ang Chinese law enforcers mismo ang involved sa amo nga insidente batok sa Vietnamese fishermen kag ginpangkuha pa ang ila nga fishing equipment.
Ang Paracel Islands ang ginakontrol sang China kag gina-claim man sang Vietnam.
Gintawag sang Vietnamese ministry nga brutal nga sahi sang treatment ang ginhimo sang Chinese law enforcement forces, kag dapat nga respetuhon man nila ang soberanya sang Vietnam.
“Vietnam is extremely concerned, indignant and resolutely protests the brutal treatment by Chinese law enforcement forces of Vietnamese fishermen and fishing boats operating in the Hoang Sa archipelago of Vietnam,” pahayag ni foreign ministry spokesperson Pham Thu Hang.
Sabat naman sang Chinese foreign ministry, iligal ang pagpangisda sang mga Vietnamese sa Paracel Islands, wala sang pahanugot halin sa gobyerno sang Beijing, gani naghulag ang Chinese authorities agud punggan sila.
“The on-site operations were professional and restrained, and no injuries were found,” suno sa China.
Base sa report sang kapital sang Vietnamese vessel, ginbakol sang salsalon ang mga manugpangisda. Ginaalegar nga yara sa 40 ka mga tawo ang nag-atake sa ila kag naglawig sang tatlo ka oras ang insidente.
Gindugang sini nga halos isa ka oras matapos ang natabo, nagkalalipong sila bangud sa sakit nga nabatyagan.
Apat sa Vietnamese crew ang gindala sa ospital sang nakaabot na sa Quang Ngai port. Isa ang nabalian sang tiil kag duha naman ang nabalian sang kamot.
