Pila ka oras matapos nga ginbaton sa Malacañang si United States President Donald Trump, nagkadto naman sa Shenzhen, China si President Ferdinand Marcos Jr. agud magtambong sa 33rd APEC Economic Leaders’ Meeting.

Pag-abot sa China, magatambong gilayon ang presidente sa isa ka gala dinner antes ang sunod-sunod nga aktibidad sini sa masunod nga duha ka adlaw.

Sa iya departure statement, ginpahayag ni Marcos nga gin-imbitar siya mismo ni Chinese President Xi Jinping.

Suno sa presidente, daku ang papel sang APEC sa global economy nga ginapaabot nga magasanyog sang 3.4 percent ang mga ekonomiya nga sakop sini sa sini nga tuig nga mas mataas ipaanggid sa ginapaabot nga pagtubo sang ekonomiya sa bug-os nga kalibutan.

Suno kay Marcos, handum sini nga mabuksan ang mas madamo nga merkado para sa mga produkto sang Pilipinas, mapadasig ang paggamit sang digital technology kag artificial intelligence, kag makaganyat sang dugang nga investment kag dekalidad nga mga trabaho sa pungsod.

Bilang chair sang ASEAN sa sini nga tuig, dal-on man sini sa APEC ang mga nalab-ot sang Pilipinas sa pagpamuno sini sa ASEAN, lakip na ang ASEAN Digital Economy Framework Agreement.

Ginpahayag man ni Marcos nga padayon niya nga panindugan ang national interest sang Pilipinas sa iya pagpakig-angot sa China, samtang ginapasangkad ang patigayunon sa negosyo, investment kag pagbayluhanay sang relasyon sang mga pumuluyo sang duha ka pungsod.

Nagapati ang presidente nga ang iya pagpartisipar sa nasambit nga pagtililipon makahatag sang dugang nga trabaho kag mas maayo nga access sa serbisyo para sa ikaayong lawas sang mga Pilipino.

Natalana naman nga magpakigkita si Marcos sa Huwebes sa mga lider sang iban pa nga APEC member economies, lakip ang Peru, Papua New Guinea kag Chile.