Nagluntad ang malip-ot apang mainit nga tensyon sa Manila Dialogue matapos gin-claim sang isa ka bisita halin sa China nga ilegal nga gina-occupy sang Pilipinas ang Ayungin Shoal ukon Second Thomas Shoal sa sulod na sang halos tatlo ka dekada.
Suno kay Dr. Zheng Zhihua sang Shanghai Jiao Tong University, nagapugong ukon nagapakita lamang sang restraint ang China bangud sa ginahimo sang Pilipinas.
Dugang pa sini, nagagamit lamang sila sang water cannon agud depensahan ang ila teritoryo.
“China only uses water cannon. As a bigger power, I think if other countries occupy your land territory, you only use water cannon to defend your territorial integrity,” suno kay Zheng.
Maabtik naman ini nga ginkontra ni Philippine Coast Guard (PCG) spokesperson for the West Philippine Sea Rear Admiral Jay Tarriela kag ginpabutyag nga wala sang hurisdiksyon ang China sa Ayungin Shoal.
Suno kay Tarriela, 125 nautical miles lamang ang kalayuon sang nasambit nga isla halin sa Palawan kag sakop ini sang exclusive economic zone ukon EEZ sang Pilipinas, kag indi sang China.
“The last time I checked, Second Thomas Shoal is only 125 nautical miles from [Palawan]. And it is within our exclusive economic zone (EEZ), not China’s,” suno kay Tarriela nga ginpalakpakan pa sang mga nagtambong sa event.
Wala man nag-untat si Zheng sa iya nga argumento kag ginkwestyon ang pag-angkon sang Pilipinas nga kabahin sang iya EEZ ang nasambit nga lugar.
Nahibaluan nga didto sa Ayungin Shoal halin pa sang 1999 ang BRP Sierra Madre nga isa ka barko sang Philippine Navy nga nagserbe nga permanente nga kampo sang mga Pilipino nga kabahin sang militar.
Sandig sa 2016 arbitral ruling, kabahin ang Ayungin Shoal sang 200-nautical-mile exclusive economic zone kag continental shelf sang Pilipinas.
Ginpamatud-an man sang arbitral tribunal nga wala sang legal nga basehan sa idalom sang United Nations Convention on the Law of the Sea ukon UNCLOS ang pag-angkon sang China sa daku nga bahin sang South China Sea.#












