Ginpatpat ni Iloilo Governor Arthur Defensor Jr. ang plano sang probinsya nga pabaskugon ang koordinasyon sang Philippine Statistics Authority (PSA), Barangay Service Point Officers (BSPOs) kag Local Government Units (LGUs) sa pagtipon sang datos sa tagsa ka banwa sang Iloilo.
Suno kay Defensor, daku ang potensyal sang BSPOs kag LGUs nga mangin kaupod sang PSA sa data gathering agud ma-institutionalize ang pagtipon sang impormasyon halin sa mga LGUs.
Dugang pa sang gobernador, importante ang datos agud mahibaluan ang aktuwal nga kahimtangan sang mga pumuluyo, lakip na ang ila pangabuhian, mga kinahanglanun kag kapasidad sa pagbakal sang mga balaklon. Suno sa iya, mahimo man nga mahibaluan ang aktuwal nga estado sang ekonomiya paagi sa pag-monitor sang presyo sang mga balaklon sa mga panindahan.
Ginpunto man sini ang importante nga papel sang BSPOs kun sa diin mas nahibaluan nila ang sitwasyon sang mga panimalay sa ila tagsa ka barangay, rason nga mahimo sila mangin importante nga kaupod sa pagtipon sang datos kag paghibalo kun ano nga bulig ang kinahanglan sang mga pumuluyo.
Samtang, may yara na sang data repository kag 4K for MoRProgres Dashboard ang probinsya nga nagatipon sang impormasyon tuhoy sa personal nga datos sang mga pumuluyo, lakip na ang ila contact numbers, agud mapadasig ang pagresponde sa ila mga kinahanglanon, labi na sa tion sang emerhensya.
Kabahin man sa mga programa nga na-integrate sa inisyatibo ang mental health kag psychosocial interventions, mga programa sang TESDA kag DepEd, kag technical-vocational training.
Ginpabug-atan man ni Defensor nga importante ang data gathering kag digitalization sa pagplano sang mga programa sang gobyerno agud masiguro nga nagasanto ang mga serbisyo nga igahatag sa aktuwal nga kinahanglanun sang mga pumuluyo.














