Magapatigayon sang mobilisasyon ang nagkalain-lain nga youth kag student organizations sa Iloilo Provincial Capitol agud ipanawagan ang dugang nga pondo para sa edukasyon kag pagpanabat sa nagapadayon nga korapsyon.
Kabahin ini sang pagsaulog sang National Students’ Day sa Pilipinas nga nagakilala sa importante nga kontribusyon sang mga estudyante kag ila aktibismo sa demokrasya kag pagsanyog sang pungsod.
Sa interview sang Bombo Radyo kay Matthew Gonzaga, Vice President sang Anakbayan Visayas, iya ginpahayag nga ang nagapanguna nga panawagan sang ila grupo amo ang dugang nga pondo para sa sektor sang edukasyon.
Ginpatuhuyan ni Gonzaga ang rekomendasyon sang UNESCO nga dapat mag-pain ang mga pungsod sang apat tubtob anum ka porsyento sang ila Gross Domestic Product (GDP) ukon 15 tubtob 20 porsyento sang kabug-usan nga galastuhon sang gobyerno para sa edukasyon.
Suno kay Gonzaga, sa ginaduso nga P7.2-trillion nga national budget para sa 2027, duha tubtob tatlo lamang ka porsyento ang gin-alokar para sa amo nga sektor.
Samtang, kun basehan naman ang data sang Department of Budget and Management (DBM), nagalab-ot sa P1.326-trillion ang ginpain nga pondo para sa basic kag higher education sa 2027 nga katumbas sang 3.99 porsyento sang GDP.
Dugang diri, ipanawagan man sang grupo ang pagpasabat liwat sa mga responsable sa trillion-peso corruption sa flood control projects kag iban pa nga isyu sang pork barrel corruption.
Nagapamatok man ang grupo sa pagbaton kay United States President Donald Trump kag ginapanawagan sa administrasyon ni President Ferdinand Marcos Jr. nga indi pagtaguon ang matuod nga sitwasyon sang pungsod antes ang ASEAN summit.
Bwas, magatipon anay ang mga raliyista sa University of the Philippines Visayas-Iloilo City kag West Visayas State University sa distrito sang La Paz antes magmartsa pakadto sa Iloilo Provincial Capitol 3:00 sa hapon.
Ginalauman nga linibo ka estudyante halin sa nagkalain-lain nga bahin sang Panay ang maga-upod sa amo nga mobilisasyon.#








