Gina-discourage sang Iloilo City Local Housing Office ang mga pumuluyo sa pagtukod sang mga estruktura malapit sa Jaro River para lamang makabenepisyo sa housing program sang Iloilo City Government.

Ini ang kasunod sang pagpatigayon sang cadastral line delineation survey sa amo nga suba nga ginapondohan sang syudad bilang preparasyon sa mga tikang para sa flood mitigation, rehabilitation, kag posible nga relocation sang mga apektado nga pamilya.

Sa interview sang Bombo Radyo kay Atty. Peter Jason Millare, head sang ICLHO, iya ginpahayag nga ang tuyo sang syudad amo ang pagsolbar sa problema sang informal settlers kag pagnubo sang ila numero, kag indi ang pagdugang pa sini.

Ginabanta nga yara sa 500 tubtob 1,000 ang informal settlers sa palibot sang suba, apang ginalauman nga ang aktwal nga survey amo ang magahatag sang mas eksakto nga datos tuhoy sa ila kadamuon.

Suno kay Millare, wala pa sang masiguro ukon mapromisa nga relocation site sa subong bangud yara pa lamang sa proseso sang pagplano ang pagbalhin sa mga apektado nga pamilya.

Ginbalikan man niya nga una nga gintutukan sang Housing Office ang pagtumod sa mga formal settlers syudad, apang sang nakita ang kakulangan sa mga polisa, ginduso ang pagpasar sang Pasilong Code kag sunod nga ginlunsyar ang Pasilong Program.

Dugang pa ni Millare, paagi sa survey, mas maathag na nga matul-id ang eksakto nga dulunan sang Jaro River, ang mga lugar nga nasakop na sang mga estruktura kag ang kadamuon sang mga panimalay nga nagatindog sa mga silted portion.

Ginpaathag niya nga indi ma-tag kun ang isa ka balay yara sa danger zone kun wala pa nahibaluan ang eksakto nga kadakuon kag dulunan sang suba.

Nahibaluan nga nagalab-ot sa P6,028,860 ang pondo sa survey nga sabton sang Iloilo City Government kag magasakop sa bug-os nga kalabaon sang Jaro River, halin sa dulunan sang Pavia, Iloilo tubtob sa baba sini sa Iloilo Strait, nga naga-cover sa indi magnubo sa 10 ka barangay sa mga distrito sang Jaro kag La Paz.