Luyag sang Iloilo Provincial Government nga mapabaskog ang koordinasyon sa Philippine Statistics Authority (PSA) agud ma-integrate ang data gathering efforts sang mga Barangay Service Point Officers (BSPO) sa national data system.

Sa interview sang Bombo Radyo kay Iloilo Governor Arthur Defensor Jr., iya ginpahayag nga dako ang papel sang mga BSPO sa pagtipon sang data sa mga komunidad bangud direkta sila nga nagapakig-angot sa mga pumuluyo kag nakahibalo sa kahimtangan sang tagsa ka panimalay.

Gin-athag sang gobernador nga samtang ang PSA ang nagapanguna sa pagtipon sang national data, may kaugalingon man nga sistema sang data gathering ang probinsya nga ginahimo kag ginabuligan sang mga BSPO.

Gani, luyag sang provincial government nga makig-partner sa PSA agud mas mapalapad, ma-integrate kag ma-institutionalize ang paggamit sang data sa pagplano kag pagpatuman sang mga programa sang gobyerno.

Suno kay Defensor, mas mahapos para sa BSPO ang pagkuha sang impormasyon sa mga panimalay tungod kilala nila ang mga tawo kag ang komunidad nga ila ginaserbisyohan.

Ginapasalamatan man ni Defensor ang mga BSPO sa ila kontribusyon sa pagtipon sang importante nga impormasyon nga ginagamit sa pagmonitor kag pagplano sang mga programa sang probinsya, lakip na ang mga data nga makita sa dashboard.

Samtang, ginpahayag sang gobernador nga nagapain ang probinsya sang pondo para sa capacity-building activities agud mapauswag pa ang abilidad sang mga BSPO sa data gathering.#