Wala na nakagwa sa isa ka establisyemento sa Pavia, Iloilo ang isa ka lalaki nga ginatudlo nga nagpangawat matapos nga natulugan ini sa sulod mismo sang lugar nga iya ginsudlan.

Ang suspek nga ginkilala kay alyas Jerry, 43-anyos, ang gin-aresto sang kapulisan matapos nga sila pa ang nagpukaw sa iya sang nagresponde sa lugar pasado alas-dose sang udto sang Domingo, Nobyembre 15.

Sa interview sang Bombo Radyo kay Police Captain Ryan Christ Inot, Officer-in-Charge sang Pavia Municipal Police Station, iya ginpahayag nga sandig sa CCTV footage, nakita ang suspek nga nagsulod sa establisemento antes ini natulugan sa sulod, nga posible bangud sa impluwensya sang makahulubog nga ilimnon.

Ginpahayag ni Inot nga ang tag-iya sang establisemento ang nagtawag sa kapulisan matapos nila mamutikan nga may tawo sa sulod sang adlawon na.

Suno kay Inot, ginkakibot man sang mga pulis sang may nakita sila nga suspected shabu sa bulsa sang suspek sang gin-updan nila ini sa comfort room sa sulod sang police station, matapos nga naghingyo nga magamit sang kasilyas.

Ginabanta nga nagabalor sang P900 tubtob P1,000 ang mga sinsilyo nga nakuha sang suspek, samtang gin-alegar man nga gin-guba sini ang bintana kag puertahan sang establisemento agud makasulod.

Pahayag pa sini, pasakaan ang suspek sang panumbungon nga theft kag paglapas sa Republic Act 9165 ukon Comprehensive Dangerous Drugs Act of 2002 bangud sa ginalegar nga pagpanag-iya sang illegal nga droga.

Wala pa sang dugang nga impormasyon ang kapulisan nahanungod sa personal nga detalye sang suspek bangud wala ini nagasabat sa ila mga pamangkot. Wala man sang bisan sin-o nga nagbisita sa iya halin sang adlaw sang pagkaaresto. (via Bombo Ireca Faye Pioquinto)