Nagsaka sa 7.2% ang inflation ukon pagtaas sang presyo sang mga balaklon sa Pilipinas sang Setyembre 2026 halin sa 6.1% sang Agosto.
Suno sa Philippine Statistics Authority (PSA), ini ang pinakamataas nga inflation rate sa sulod sang tatlo ka tuig kag katumbas sang lebel nga na-rekord sang Abril.
Pahayag pa sang ahensya, 11 sa 13 ka commodity groups ang nakarekord sang mas madasig nga pagsaka sang presyo sang Setyembre.
Pinakamataas ang kontribusyon sang pagkaon kag non-alcoholic beverages nga nagsaka ang inflation sa 6.7 porsyento halin sa 4.6 porsyento kag nag-contribute sang 73.4 porsyento sa kabug-usan nga pagsaka sang inflation.
Nagsaka man ang presyo sang housing, tubig, kuryente, gas kag iban pa nga fuel sa 8.4 porsyento halin sa 7.9 porsyento, samtang ang transport inflation nagsaka sa 14.6 porsyento halin sa 13.5 porsyento.
Samtang, ang information kag communication lamang ang nagrekord sang mas manubo nga inflation sa 0.9 porsyento, kag wala naman sang pagbag-o ang financial services nga nagpabilin sa zero growth.
Matandaan nga sang Hulyo, ginpasaka sang Development Budget Coordination Committee (DBCC) ang inflation target halin sa 6 percent tubtub 7 percent subong nga tuig, nga mas mataas sa target range sang Bangko Sentral ng Pilipinas nga 2 to 4 percent.
Halin sang Enero tubtob Setyembre 2026, naglab-ot sa 5.4 porsyento ang average inflation nga mas mataas kumpara sa 1.7% nga average sa amo man nga tion sang nagligad nga tuig.#
