Gintudlo sang Land Transportation Office (LTO) VI ang accountability ukon salabton sa mga ginikanan kaangot sa duha ka mga babaye nga naghigda sa pedestrian lane sa Fort San Pedro, City Proper apisar nga may malabay kuntani nga salakyan.

Sa interview sang Bombo Radyo kay Atty. Gaudioso Geduspan II, ang director sang LTO Region VI, iya ginpahayag nga wala man sang traffic violation bangud wala man sang dala nga salakyan ang duha ka babaye.

Apang ginkwestyon sini kun ano ang ginahimo sang ginikanan kag ngaa nagahigda sa tunga sang dalan ang ila kabataan.

“Wala man sang traffic violation na di kay te wala man sila sang dala nga salakyan, and based sa information, minors man ni sila. Siguro ang accountability sini will fall on the parents, kun ngaa gaamo ni inyo bata? Wala ninyo gina-supervise nga gahigda sa dalan?,” suno kay Geduspan.

Pahayag sini, indi lamang ang mga naghigda sa karsada ang mabutang sa delikado nga sitwasyon, kundi mangin ang mga motorista nga nagalabay bangud wala nila ginapaabot nga may nagahigda sa pedestrian lane.

“Pedestrian lane is for walking, indi na siya hiligdaan, indi lodging house, indi space for lying down,” pahayag pa sini.

Nauna na nga ginkumpirma sang Iloilo City Police Office (ICPO) na-identify na ang duha ka mga babaye kag natumod nga lunsay menor de edad.

Kuha ang amo nga video sang gab-i kun sa diin makit-an pa ang isa nga daw kaangay nga naga-ligid-ligid.

Sang ulihi, nagbangon man ang duha kag nagdalagan pakadto sa kilid sang dalan kun sa diin may iban nga kabataan nga nagahulat sa ila kag nagakuha pa sang video.

Ginapaatubang man ang amo nga mga menor de edad kag ang ila mga ginikanan sa City Social Welfare and Development Officer (CSWDO), kag Women and Children Protection Desk (WCPD).

Suno sa ICPO, iga-refer anay sa legal officer sang talatapan kun posible nga may panumbungon nga ipasaka, kag kun ano ang himuon pananglitan matabo pa gid liwat.

“Sa mga minors natin, wag na nilang gayahin, wag na nilang gawin. Wag na sila gumawa ng mga kalokohan na ikakapahamak nila, wala itong mapuntahan na maganda,” kabahin sang mensahe ni ICPO Director Police Colonel Wilbert Parilla.#