Nagpadulong sa Metro Manila si Iloilo City Vice Mayor Lady Julie Grace “Love-Love” Baronda agud magtambong sa ASEAN Governors and Mayors Forum (AGMF) 2026.
Sa Facebook post ni Baronda, ginpahayag sini nga isa ka daku nga kadungganan para sa iya ang makatambong sa nasambit nga forum bilang Vice President for Visayas sang Union of Local Authorities of the Philippines (ULAP) kag Vice Mayor sang Iloilo City.
Ginkabig man niya ini nga oportunidad agud makapaambit sang mga ideya kag eksperyensya upod sa mga local government leaders halin sa nagkalain-lain nga bahin sang Southeast Asia.
Suno kay Baronda, importante ang amo nga pagtililipon agud mahangpan ang nagkalain-lain nga isyu kag mga pagsulay nga ginaatubang sang mga siyudad, lakip na ang mga pamaagi sang iban nga local governments sa pag-atubang kag pagsolbar sini.
Madumduman nga antes ang pagpadulong ni Baronda sa Manila, nangin sentro sang deliberasyon sa Sangguniang Panlungsod ang iya panugyan nga mangin co-author sang Comprehensive Youth Development Code Ordinance ni Sangguniang Kabataan (SK) Federation President Jelma Crystel Implica.
Ginmanifest ni Baronda ang iya luyag nga mangin co-author bangud madamo sa mga probisyon sang ordinansa ang kaangay sang iya man nga proposed ordinance nga nagatinguha nga magtukod sang Iloilo City Youth Development Division.
Apang, wala makadesisyon ang majority sang konseho parte sa iya co-authorship bangud sa legal nga mga pamangkot nga may kaangtanan sa DILG Opinion No. 95, Series of 2025, nga gin-adopt sa Internal Rules of Procedure sang konseho.
Tungod sini, ginbawi ni Implica ang motion nga ipasar ang nasambit nga ordinansa sa second and final reading agud hatagan pa sang tion ang mga konsehal nga maresolbar ang isyu, apang pasado ini sa second reading.
Sa piyak nga bahin, nahibaluan nga nagtambong man si Iloilo City Mayor Raisa Treñas sa nasambit nga forum.
Text by: Bombo Cyrene A. Nasis














