Ginpahanumduman ni Iloilo City Sangguniang Kabataan (SK) Federation President Jelma Crystel Implica ang SK Councils nga mag-focus sa youth empowerment kag youth development projects agud malikawan nga maulamid sa bisyo kag ilegal nga mga buluhaton.
Ginbuyagyag man niya nga bag-o lang natapos ang Ilonggo Kabataan program sang Agosto kag Setyembre 2026 nga nangin sentro ang participation, education, security, inclusion and equity, kag active citizenship.
Padayon man ang partnership sang SK Federation sa mga school-based kag youth organizations sa kada barangay nga naga-conduct sang advocacy kontra ilegal nga droga.
Yari ang kaundan sang statement ni Implica:
“Sa aton mga SK Officials, gusto ko lang kita tanan mapahanumdom nga ang posisyon nga aton gina-occupy subong indi lang ini titulo ukon responsibilidad, ini isa ka daku nga pagsalig nga ginhatag sa aton sang aton mga kasimanwa nga kabataan.
Gin-elect kita para mangin tingog sang kabataan, mangin halimbawa, kag mangin mga change-makers sa aton komunidad. Gani, bilang mga youth leaders, importante gid nga kabalo kita magdala sang aton kaugalingon kag magdesisyon sing insakto.
Likawan naton ang mga butang nga makahalit sa aton kaugalingon, sa aton pangalan, kag sa pagsalig nga ginhatag sa aton. Iwasan naton ang mga malain nga butang kag mga desisyon nga mahimo makaguba sa aton future kag sa aton serbisyo sa kabataan.
Indi kita perpekto, pero may ara kita permi sang choice nga maghimo sang insakto. Let us choose to be responsible, disciplined, and worthy of the trust given to us.”
Ini nga panugyan ni Implica may kaangtanan sa isa ka SK Kagawad sang Barangay Oñate De Leon, Mandurriao Iloilo City nga nadakpan sa ginpatigayon nga drug buy-bust operation sa Barangay Tabuc Suba, Jaro, Iloilo City, pasado alas-7 sang gab-i, Oktubre 19.
Text by: Bombo Cyrene A. Nasis
