Ginmando ni LTO-6 Regional Director Atty. Gaudioso Geduspan II nga kinahanglan magkuha sang conductor’s license ang mga konduktor kag public assistance officers.
Ini agud masiguro nga nakatapos sila sang nagakaigo nga training.
Sa interview sang Bombo Radyo kay Geduspan, ginpahayag nga kabahin sa training ang pagtudlo sang proper courtesy, passenger regulations kag disiplina sa pag-atubang sa mga pasahero sang pampubliko nga salakyan.
Ini ang pahayag ni Geduspan kasunod sang mga reklamo nahanungod sa mga konduktor nga naga-body shame sa mga pasahero kag nagapanukot sang sobra nga pamasahe.
Ginpunto ni Geduspan nga ang bisan ano nga akto sang body shaming sa pasahero indi nagakadapat himuon sang isa ka public assistance officer.
Suno sa iya, ang amo nga pamatasan wala nagapakita sang proper courtesy kag disiplina sa mga personnel nga naga-serbisyo sa mga pasahero.
May mga insidente naman sang ginapahayg body shaming, verbal abuse kag passenger intimidation sa public utility vehicles sa Western Visayas nga gin-imbestigaran na subong sang LTO.
