Nagakoordinar ang Department of Environment and Natural Resources (DENR)-6 kag Iloilo City Government para mapalig-on ang adlaw-adlaw nga pagmonitor sang kalidad sang hangin sa siyudad, lakip ang posibilidad nga magdugang sang monitoring equipment sa duha ka lugar.

Sa interview kay General Services Office (GSO) Head Engineer Neil Ravena, iya ginpahayag nga nagpakig-angot na ang DENR-6 sa iya opisina nga may mga air quality monitoring equipment para sa posible nga pag-install sini sa Central Philippine University (CPU) kag La Paz Plaza.

Paathag ni Ravena, paagi sa sini nga mga kagamitan, mas masubaybayan ang kahimtangan sang ambient air quality sa nagkalain-lain nga bahin sang siyudad, ilabi na kung may pagtaas sang lebel sang polusyon ukon nagakatabo ang haze.

Suno sa iya, nagadepende sa kahimtangan sang palibot kag panahon ang resulta sang monitoring, gani importante nga mahibaluan sang publiko kung ang kalidad sang hangin yara sa fair ukon moderate nga lebel.

Ginpahayag man niya nga ginapost adlaw-adlaw online ang resulta sang monitoring, lakip ang mga advisory kung may haze, agud makaakto dayon ang mga residente kag makapatuman sang nagakaigo nga precautionary measures.

Ginpahanumdom man ni Ravena ang publiko nga magsuksok sang face mask, ilabi na ang mga may asthma kag iban nga respiratory-related illnesses.

Samtang, ginakilala man niya ang mga kahoy kag tanom sa Garden of Love sa Barangay Nabitasan, La Paz, nga nagabulig sa pagsuyop sang polusyon sa hangin, apang ginpunto niya nga kinahanglan gihapon ang padayon nga monitoring kag mga tikang agud mapabilin nga maayo ang kalidad sang hangin sa siyudad.

Text 𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬