Ginalantaw sang Bureau of Animal Industry (BAI) nga maga-import ang Pilipinas sang mas madamo nga meat products subong nga tuig bangud sa pagpanghangkat sa suplay sang karne diri sa pungsod kasunod sang epekto sang African Swine Fever (ASF).
Sa latest report sang BAI, ang volume sang imported meat ang nagsaka sang 7.8 percent pa-757.3 million kilograms sa nauna nga pito ka bulan subong nga 2024 halin sa 702.24 million kg sa amo man nga period isa ka tuig na ang nagligad.
Sa monthly basis, ginsiling sang BAI nga naga-import ang Pilipinas sang 109.55 million kg sang karne sang Hulyo lamang nga mas manubo sang 1.72 percent.
Nahibaluan nga ang pork ang may daku nga parte sa meat imports nga may share nga 49.2 percent or 372.94 million kg sang kabug-usan.
Ginasundan ini sang karne sang manok nga may 255.38 million kilograms nga katumbas sang 33.7 percent.
Ang iban pa nga meat varieties halin sa iban nga pungsod amo ang beef, buffalo, turkey, lamb, kag duck.
Nahibaluan nga may panibag-o nga hugnat sang ASF infections sa pungsod nga may aktibo nga kaso sa 14 ka mga rehiyon. Halin sa una nga outbreak sang 2019, base sa BAI record, na-infect na sini nga balatian ang 17 ka mga rehiyon kag 76 ka mga probinsya sa bilog nga pungsod.
