Isa ka man bala sa naghibi sa istorya nanday Fidel kag Stella?
Igabalik nanday Bella Padilla kag JC Santos ina nga balatyagon paagi sa “100 Awit Para Kay Stella” nga amo ang ginakalangkagan nga sequel sang 2017 romance-drama film nga “100 Tula Para Kay Stella.”
Mismo si Bella ang nag-repost sa Instagram sang art card nga naga-anunsyo sang sequel. May caption ini nga, “We heard you [red heart emoji].”
May yara man sang gin-share ang actress-host nga clips kag mga laragway halin sa ila una nga pelikula kag ang istorya sang nag-shoot sila sa pila ka mga eksena.
Gin-anunsyo man sang Viva Films ang sequel paagi sa caption sa Instagram nga: “Kumusta na kaya ‘yung mga ginawa mong ‘mundo’ noon?”
Una nga ginpakita ang “100 Tula Para Kay Stella” sa 1st Pista ng Pelikulang Pilipino kag nakatipon sang P80 million sa box office nga amo ang leading film sa 12 entries sa amo nga festival sang 2017.
Istorya ini sang honor student nga si Fidel nga may yara sang speech impediment. Nakilala sini si Stella nga isa ka aspiring rocker. Nag-updanay sila bilang freshmen sa Pampanga kun sa diin sila nagakuha sang psychology degree. Apisar magkatuhay ang ila nga mga personalidad, nangin suod sila nga mag-abyan. Nahulog ang buot ni Fidel kay Stella kag nagsulat ini sang mga tula agud nga magpabutyag sang iya paghigugma.
Magluwas sa karakter nanday Bella kag JC, magabalik man si director Jason Paul Laxamana sa pag-sulat kag pag-direct sa sequel.
Ginahulat pa ang release date kag full cast line-up para sa second installment sang amo nga pelikula.#
