Ginpanubo na sa Category 3 ang anay Category 5 Hurricane Milton samtang labi ini nga nagapalapit sa state sang Florida sa Estados Unidos sang Amerika.
Apisar nagnubo ang kategorya, nagpaandam ang weather forecasters sang daku gihapon nga mga halit nga posible dal-on sini sa mga residente.
Suno sa National Hurricane Center, posible nga mag-landfall ini Myerkules sang gab-i (US time).
Padayon ang pagpangabay sa mga residente nga magbakwit bangud possible mapatay sila kun magpakatig-a pa nga magtinir sa delikado nga lugar.
Gintawag man ini ni US President Joe Biden nga “storm of the century” sa isa ka White House press briefing. Una na ini gindeklarar nga national emergency antes pa man ang ginalauman nga pag-landfall sini sa west coast sang Florida malapit sa Manatee county.#
