Nag-abot sa Buenos Aires, Argentina ang amay ni Liam Payne agud bisitahon ang hotel kun sa diin nahulog kag napatay ang 31-anyos nga former One Direction star.
Ginkadtuan sini ang balkonahe sang hotel room kun sa diin natabo ang insidente kag nagkadto man sa vigil sang fans sa guwa sang hotel.
Nagpasalamat man ini sa fans sang British musician sa pagpangamuyo, pagsindi sang kandila, kag pagbutang sang mga pictures kag bulak para kay Liam.
Antes sina, ginkadtuan man ni Geoff Payne ang morgue sa Buenos Aires agud nga pormal nga ma-identify ang bangkay sang iya anak.
Nagkadto man ini sa prosecutor’s office nga naga-imbestigar sa kaso agud nga matigayon na nga ma-repatriate ang bangkay Liam pabalik sa United Kingdom.
Siya man ang naghapit sa Casa Sur hotel agud nga madala-pauli ang mga personal nga gamit nga nabilin sang iya anak.
Huwebes sang aga (oras sa Pilipinas) sang na-report ang gulpyada sini nga kamatayon.
Base sa Argentina National Prosecutor’s Office, may 25 ka injuries si Payne bangud sa pagkahulog kag ang mayor gid nga rason sang iya kamatayon amo ang “polytraumatism, internal kag external hemorrhage.”
Sa statement sang opisina, ginsiling nga nagguwa sa autopsy nga posible nahulog ang 31-anyos nga musician samtang wala na sang pangalibutan ukon kun may ara man, posible nga naga-agaw-agaw na ang iya nga animo.
May subtances man nga nakit-an sa kuwarto ni Payne nga ginpahayag sang prosecutor’s office nga posible makapamatuod sang alcohol kag drug consumption.
Ginsaad man sa report nga natul-id sa ila imbestigasyon nga isahanon lamang ini sang natabo ang insidente.
Natukod ang grupo nga One Direction sa The X Factor sang 2010 kun sa diin yara man sanday Harry Styles, Louis Tomlinson, Zayn Malik kag Niall Horan.#
(Photo: Reuters)
