Ang iban sa aton ang nagahandum gid nga maka-set sang record agud nga makilala kita sa bilog nga kalibutan.
Indi ini imposible bangud sa iban nga mga Pinoy nga nagmarka na sang ila pangalan sa world records — sa sports, sa pageant, sa paalam-alam, abilidad, kag sa iban pa nga mga patag.
Apang may isa ka lalaki nga lain pa gid nga lebel sang record ang iya gusto nga malab-ot.
Ini amo si Ryuta Watanabe, 36-anyos kag residente sang northern prefecture sang Hokkaido, Japan nga gusto gid kilalahon bilang “god of marriage.
Gin-istorya sini nga nakabatyag siya anay sang depression kag ginbayaan siya sang iya nobya, kag amo ini ang nagtulod sa iya nga magpangilala sa bag-o nga mga babaye gamit ang dating applications.
May ara na siya subong sang apat ka mga asawa kag duha ka mga nobya kag bisan trentahon pa lamang ang iya edad, 10 na ang iya kabataan.
Ang mga babaye nga gina-upod ni Ryuta ang makabig nga common-law in nature bangud iligal sa Japan ang polygamy. Ginakilala sila nga mag-partner kag daw set-up man sang kasado nga mga indibidwal ang ila relasyon, apang wala lang sang formal registration.
Wala man sang trabaho si Ryuta sa sulod na sang isa ka dekada kag nagasalig lang siya sa mga sweldo sang iya mga asawa.
Bilang bulig sa ila, siya ang in-charge sa mga ulubrahon sa balay lakip na sa pagluto kag pagtatap sa mga bata.
Nagalab-ot ang ila expenses sa 914,000 yen (P350,000) kada bulan apang wala ini sang problema bangud ginatunga-tunga ini sang iya mga asawa kag mga nobya.
Ginsiling ni Ryuta nga nanamian gid siya sa mga babaye, kag wala man sila sang problema basta nagapalanggaanay lamang sila.
Kada babaye ang may yara sang kuwarto sa ila balay, kag nagasaylo-saylo lang siya kada gab-i kun sin-o ang iya tupadan.
Ginpadayaw pa sini nga 28 ka beses siya nga nagapakighilawas sa kada semana kag wala man nagapangimon ang iya mga babaye bangud mag-abyanay man sila tanan.
Sa pagkamatuod, gusto pa ni Ryuta nga makakita sang bag-o nga palangasaw-on.
Okay na sa iya nga makabata sang 54 ka bilog bangud ang gusto sini gub-on nga record amo ang iya sang Japanese shogun nga si Tokugawa Ienari nga napatay sang 1841.
Si Tokugawa nga amo ang longest-serving shōgun sang Tokugawa shogunate sang Japan ang ginareport nga may 53 ka bata kag may 27 ka ginapuyo nga babaye sang Edo Period ukon tunga-tunga sang 1603 kag 1868.
