Dalayawon ang imbukada nga performance sang four-time National Basketball Association (NBA) champion nga si Klay Thompson sa regular season kaupod ang bag-o sini nga team nga Dallas Mavericks.
Naka-22 points si Thompson sa iya Dallas debut kag nangin daku nga bulig kay Mavericks superstar Luka Doncic sa 120-109 NBA victory batok sa San Antonio Spurs.
May 28 puntos naman ang Slovenian star kag may 10 rebounds para sa Mavs.
Ang Mavericks nga pangaduha sa Boston Celtics sang nagligad nga season ang nagkuha kay Thompson sa free agent deal sa off-season sa tuyo nga makabawi kag makuha ang kampyonato subong nga season.
Si Thompson — nga may apat ka titulo sa iya 13 ka seasons kaupod kay Stephen Curry kag Golden State Warriors — ang nalipay man sa iya performance. Ang iya anum ka tres amo ang pinakadamo nga three-pointers nga nahimo sang bisan sin-o nga player sa iya Mavericks debut.
“Blue is my favorite color,” pahayag sini pagkatapos sang hampang. “And Mavs blue looks good on me.”
Nakabulig man sa Dallas ang 15 puntos ni Kyrie Irving.
Nagpanguna naman sa Spurs si Victor Wembanyama nga may 17 points samtang binudlayan naman sa shots ang 11-time All-Star point guard nga si Chris Paul. Three points, seven rebounds, eight assists kag one steal ang nahimo sini sa iya debut sa Spurs.
