Ginpasalig ni Finance Secretary Ralph Recto nga bastante ang pondo sang national government para nga suportahan ang rehabilitation efforts sa mga lugar nga labi gid nga apektado sang Severe Tropical Storm Kristine.
Suno kay Recto, mahimo magamit ang pondo agud maka-augment sa disaster preparedness and response efforts sang local government units.
Sa idalom sang General Appropriations Act of 2024, may pondo ang national government sa idalom sang National Disaster Risk Reduction and Management Fund (NDRRMF) kag Quick Response Fund (QRF) agud maghatag sang nagkalain-lain nga disaster relief operations.
Ini nga pondo ang mahimo gamiton sa reconstruction, rehabilitation, kag pag-repair sa guba nga mga dalan, taytay, buildings, kag iban pagkatapos sang kalamidad.
Gamiton man ini sa paghatag sang food packs, first aid and medicines, temporary shelters, emergency needs, kag iban pa nga necessities.
Mahimo man suno kay Recto maggamit ang additional funds paagi sa unprogrammed funds, ang $500 million standby credit line, ang Rapid Response Option (RRO) facility, mga contingent emergency response components halin sa World Bank, kag ang post-disaster standby financing halin sa Japan.
Nahibaluan nga 81 na ang na-report sa Office of Civil Defense (OCD) nga nagkalamatay bangud kay Bagyo Kristine.
Kahapon, nag-abot si President Ferdinand Marcos Jr. sa Camarines Sur agud personal nga icheck ang sitwasyon. Ginmanduan man sini ang Department of Public Works and Highways (DPWH) nga tun-an liwat ang Bicol River Basin Development Program (BRBDP) para makahatag sang long-term solution sa pagbaha sa rehiyon.
(Photo: Greenpeace/FB)
