Naga-sunod-sunod ang bulig nga ginahatag sang iban nga mga pungsod kag humanitarian organizations kasunod sang paglaslas sang Bagyo Kristine sa Pilipinas nga nagbilin na sang 110 ka mga patay.
Kabahin diri ang emergency food truck sang Australia nga “Bluey” nga ginpadala sa Camarines Sur agud maghatag sang hot meals sa apektado nga mga residente.
Suno kay Australian Ambassador to the Philippines HK Yu, ini ang parte sang madugay na nga pagparesay sang Australia kag Philippine Red Cross sa paghatag sang maabtik nga humanitarian assistance.
“My thoughts are with the communities affected by Typhoon Kristine across Luzon and Visayas. We are in contact with Philippine government partners who are responding to the situation. Australia stands ready to assist,” dugang sini.
Ginhulag naman sang United States Agency for International Development (USAID) ang 50 trucks agud magdala sang family food packs kag relief items sa 425,000 nga apektado nga mga indibidwal partikular na sa Bicol.
Sa pihak nga bahin, si Chinese Ambassador to the Philippines Huang Xilian ang nagpahayag man nga handa ang China sa pagbulig sa Pilipinas.
“Sending our heartfelt sympathies to the Filipino people during this difficult time as Typhoon Kristine wreaks havoc. Our thoughts are with all those affected. We stand ready to lend a helping hand. Stay safe and dry, everyone,” pahayag sini.
Sini lang nga weekend, nag-abot man sa Col. Jesus Villamor Air Base sa Pasay City ang C-130 cargo aircraft halin sa Republic of Singapore Air Force kag ang Eurocopter EC725 transport helicopter halin sa Royal Malaysian Air Force. Ini nga air assets halin sa kaiping nga mga pungsod ang magabulig sa Philippine Air Force sa mga operasyon sini sa pagdul-ong sang humanitarian aid supplies sa mga komunidad nga gin-igu sang bagyo.
“During this challenging time, Singapore stands with our friends in the Philippines. This response underscores our warm defense ties and close Humanitarian Assistance and Disaster Relief (HADR) cooperation, as well as the enduring friendship between Singapore and the Philippines,” kabahin sang statement sang Singapore Embassy in Manila.
Matandaan nga una na nagmandu si President Ferdinand Marcos Jr. sa paggamit sang Enhanced Defense Cooperation Agreement (EDCA) sites para sa airlift operations sang Armed Forces of the Philippines (AFP).#
