Ginplastar ni anay President Rodrigo Duterte sa atubang sang Senado nga wala siya nakadumdom nga nakatawag siya kay retired Police Colonel Royina Garma agud magpangita sang police officer nga miyembro sang Iglesia ni Cristo (INC) agud nga mangin in-charge sa drug war implementation.
Kun madumduman, sa House Quad Comm hearing, ginsiling ni Garma nga sang Mayo 2016, nagpanawag si Duterte sa iya sang kaagahon agud magpangita sang miyembro sang INC nga pulis para nga magpanguna sa nationwide implementation sang kampanya kontra iligal nga droga.
Suno kay Garma, pareho ini sa ginahimo sa Davao City kay may cash nga ginahatag sa pulis nga makapatay sa drug personalities.
Didto kag ginrekomendar ni Garma kay Duterte si resigned National Police Commission (NAPOLCOM) commissioner Edilberto Leonardo.
Apang sa hearing sang upper chamber, sang ginpamangkot ni Senator Jinggoy Estrada, ginsiling ni Duterte nga butigon si Garma.
Namangkot pa si Duterte kun ano abi ang iya rason para nga i-specify ang relihiyon sang INC sa amo nga tawag. Ginpahayag pa sini nga wala siya sang labot sa relihiyon basta ginahimo lang sang pulis ang iya nga trabaho.
“I do not remember calling her and for what? Presidente ako. Nandiyan na ‘yun… lahat nasa akin na… [I was President, everyone was on my side],” suno sa former president sa iya pag-atubang sa Senate blue ribbon committee.
“I hate to say this but nagsisinungaling ‘yang gagang ‘yan. Bakit ako mamili ng Iglesia ni Cristo? Eh di pati ang mga Aglipay isali ko nalang, ‘yung Mormons. Why would I zero in sa Iglesia ni Cristo? For what reason?”
Ini nga statement ni Duterte ang nagasumpakil sa iya nauna nga ginbuy-an nga statement sa interview sa iya sang iya anay presidential legal counsel nga si Atty. Salvador Panelo sa Sonshine Media Network International (SMNI) sang tinalikdan nga Oktubre 17.
Sa amo nga interview, ginkumpirma una ni Duterte nga nagpangita gid man siya sang pulis nga miyembro ni INC agud suno sa iya, malikawan nga bulsahon ang operational funds nga para sa drug war.
Si Garma amo ang ginasiling nga paborito anay nga pulis ni Duterte kag nakaserbe man bilang former Philippine Charity Sweepstakes Office (PCSO) general manager.
Sa House quad comm, namensyonar man ini ang Davao Death Squad kag ang iya eksperyensya sa ginaalegar nga cash rewards system sa pagpatay sa drug suspects.
Nahambal man sini pati ang pangalan ni Senator Christopher “Bong” Go nga involved sa implementasyon sang drug campaign.
