Duha ang patay kag pito ang napilasan sa duha ka magkasunod nga insidente sang pagpangluthang nga kahimuan sang isa lamang ka gunman sa Halloween street celebration sa downtown Orlando, Florida sa Estados Unidos sang Amerika.
Una natabo ang insidente pasado ala una sang kaagahon sang Byernes oras sa amo nga state samtang yara ang costumed celebrants sa downtown bar kag restaurant district.
Minutos ang nakaligad, ginsundan ini sang isa pa ka shooting incident sa malapit lamang nga area kun sa diin nadakpan na ang 17-anyos nga suspek.
Naga-edad 19-39 anyos ang edad sang mga pilason kag subong yara na sa estable nga kondisyon.
Na-recover man sa suspek ang handgun nga gingamit sini kag ginkumpirma sang otoridad nga wala na sang iban pa nga mga suspek.
Ginahibalo pa subong ang motibo sang solterito sa pagpangluthang kag ang mga kaso nga atubangon sini.
Gina-assess man sang police department ang pagkinahanglan sang mas madamo nga mga pulis nga magapatrolya sa amo nga area subong nga weekend.
