Nagpaandam ang China sa Pilipinas, Japan, kag Estados Unidos sang Amerika batok sa “paghampang sa kalayo.”
Ini ang ginmuno sang China matapos nga nagtipon ang linibo ka soldado sa Pilipinas para sa tuigan nga joint military exercises.
Suno kay Chinese foreign ministry spokesman Guo Jiakun, ang matuod nga kinahanglan sang Asia-Pacific region amo ang kalinong kag indi ang pagpasulod sang external forces agud nga mabahin-bahin ang rehiyon.
Suno pa sa iya, ang military cooperation sa tunga sang mga nasyon ang indi dapat magpahuyang sa mutual understanding kag pagsalig sa tunga sang regional countries kag indi dapat magguba sa regional peace and stability.
“We wish to remind the countries concerned that blindly binding themselves together in the name of security will only be akin to playing with fire — ultimately backfiring upon themselves,” suno kay Guo.
Ang statement sang China ang nagapatuhoy sa Balikatan exercise 2026 nga amo ang pinakadaku nga pag-updanay sang US kag Pilipinas.
Nag-umpisa ini kahapon kag magalawig tubtub sa Mayo 8.
Masobra sa 17,000 personnel ang nagapakigbahin diri nga halin sa Pilipinas kag US, kag may yara man halin sa Australia, Canada, France, Japan, United Kingdom kag New Zealand.
May 17 man ka mga pungsod nga observers nga nagalakip sang Czech Republic, Lithuania, Poland kag the Netherlands.
Nahibaluan nga ginakabig sang Armed Forces of the Philippines (AFP) ang Balikatan nga ginahiwat sa masobra tatlo na ka dekada nga isa ka buhi nga testament sang mabakod nga alyansa sang US kag Pilipinas.
