Bukas si President Ferdinand ”Bongbong” Marcos Jr. sa paghatag sang clemency kay Mary Jane Veloso, ang Pinoy nga natalana nga isaylo sa isa ka pasilidad sa Pilipinas matapos nga napreso sang tinuig sa prisuhan sa Indonesia kasunod sang drug conviction.
Gin-anunsyo ni Marcos sang Miyerkules nga nakalab-ot na sang kasugtanan ang gobyerno sang Pilipinas sa mga otoridad sang Indonesia nga ibalik sa pungsod si Veloso. Ini ang ginkumpirmar sang Jakarta.
Ang mga abogado ni Veloso, sang nahibaluan ang tikang, nag-apelar kay Marcos nga hatagan siya sang kaluoy.
Nadakpan si Veloso sa isa ka airport sa Yogyakarta sa Indonesia sang Abril 2010 bangud sa pagdala sang 2.6 kilograms sang heroin. Ginsentensyahan siya sang kamatayon sang korte sang Indonesia sang Oktubre sa amo man nga tuig.
Sang 2015, gin-postpone ang pagpatay kay Veloso sa katapusan nga minuto matapos nga nadakpan sa Pilipinas ang isa ka babaye nga ginasuspetsahan nga naga-recruit sa iya para sa drug-related activities.
Ginpahayag ni Marcos nga nangin maayo ang relasyon sang Manila sa Jakarta, ginhatagan man sini sang pagtamod nga wala sang plano ang gobyerno sang Indonesia nga dugangan pa nga detain kag patyon si Veloso. Ginsulit man niya ang iya pagpasalamat sa Indonesia sa pag-uswag sa kaso ni Veloso.
