Ginkumpirma sang Philippine Eagle Foundation (PEF) ang kamatayon sang Chick No. 30 nga amo ang una nga Philippine eagle chick nga nabuto sa bag-o lang ginbuksan nga National Bird Breeding Sanctuary (NBBS) sa Davao City.
Suno sa foundation, 17-ka-adlaw pa lamang ang male eagle sang ginbawian ini sang kabuhi subong nga Nobyembre 30 kasunod sang respiratory distress nga nagresulta sa mga kumplikasyon bisan pa nga gindapatan man sang intensive medical intervention.
Sang nabuto ini nga agila, healthy pa ini suno sa statement sang foundation apang umpisa sang Nobyembre 26, nabudlayan na ini nga magginhawa kag nagapangatsi.
Lakip sa ginhimo sang mga nagatatap amo ang oxygen therapy kag fluid suctioning nga nag-stabilize man sang iya kondisyon sang makadali lamang. Apisar sang dedikasyon sa pagtatap kag padayon nga monitoring, naglala ang ginabatyag sang agila kag wala na nagmadinalag-on ang resuscitation efforts.
“Of all the chicks that they’ve successfully hatched and raised, this is the first time that the PEF breeding team had a case of yolk sac retention, which is usually linked to infection or other causes,” suno sa physician nga si Bayani Vandenbroeck nga nag-perform sang necropsy.
“Strict hygiene and management protocols were followed, so we did not expect this at all, but we will probe where else we can improve,” dugang sini.
Ginkabig anay nga daku nga kadalag-an sang nabuto si Chick No. 30 sang Nobyembre 11 bangud ini ang una nga successful birth sa amo nga sanctuary sa Davao halin sang nagbukas sila sang February 2024.
Natigayon ini kasunod sang artificial insemination paagi sa 56-day incubation period nga amo ang naghatag sang panibag-o nga paglaum sa conservationists kag sa species.
Kasunod sang kamatayon sini, ginsiling sang PEF nga leksyon ini kun daw ano ka delikado ang ila kabuhi.
“As we mourn this loss, we also draw inspiration from the lessons learned, which will guide us in our mission to protect and recover the Philippine eagle population,” kabahin sang statement.
Nahibaluan nga ginakonsiderar sang International Union for Conservation of Nature nga “critically endangered” ang Philippine eagle kag may 400 pairs na lamang ang nabilin subong.#
