Patay ang isa ka lalaki matapos gintiro sa Brgy. Panginman, Leon, Iloilo.
Ang biktima amo si Alyas Boying, 37, isa ka driver kag residente sang Brgy. Biri Sur sa amo man nga banwa; samtang, ang suspek naman amo si Alyas Joven, 40, isa ka mangunguma kag residente sang Brgy. Panginman, Leon.
Sa interview sang Bombo Radyo kay Police Captain Martin Pugales, hepe sang Leon Municipal Police Station, iya ginpahayag nga ginsaway sang biktima ang suspek sa isa ka namatyan sa nasambit nga lugar kun sa diin may pagbinaisay nga natabo rason nga ginpapauli sila nga duha.
Dugang pa sang natungdan, nagsakay sa motorsiklo papauli ang suspek apang nag-abtanay sila sang biktima nga nagalakat.
Didto kag nag-komprotahanay ang duha kag ginhampak sang biktima ang supek sang side mirror rason nga natumba ini sa motorsiklo kag sang nagtindog, nag-gabot ini sang armas-luthang kag gintiro ang biktima.
Naka-angkon ini sang apat ka gunshot wounds sa iya dughan kag tiyan kag gilayon gindala sa Aleosan District Hospital apang ginbawian sang kabuhi.
Nagsungka naman ang supek sa punong barangay kag na-recover ang armas nga gingamit nga 357 revolver.
Sa subong, nakahunong sa Leon Municipal Police Station ang suspek kag posible nga magapangatubang sang kaso nga homicide.#
(Article: Bombo Phauline Pillora)
