Nagapabilin kay President Ferdinand “Bongbong” Marcos Jr., ang pinal nga desisyon sa pagdeploy sang mga sakayan sang Navy agud mangin “shadow” sang mga misyon sang Pilipinas sa West Philippine Sea.
Suno kay Commodore Jay Tarriela, tigpamaba sang Philippine Coast Guard (PCG) sa WPS, yara na sa Armed Forces of the Philippines (AFP) ang paghimo sang policy recommendation kay Marcos kag ang commander-in-chief, ang Presidente mismo, ang may bug-os nga awtoridad sa pagdesisyon sa sini.
Ang National Maritime Council (NMC) sang Miyerkules nagsiling nga ang mga barko sang People’s Liberation Army (PLA) Navy nagpartisipar sa pagbalabag ukon agresibo nga paghulag sang mga sakayan pandagat sang China sa Bajo de Masinloc ukon Scarborough Shoal sa West Philippine Sea.
Si Tarriela nagsiling anay nga ang isa ka barko sang PLA Navy nakita nga naga-shadow sa isa ka PCG vessel gikan sa 300 yards ang kalayuon, mga alas 7:20 sang aga sang Miyerkules samtang nagapakadto ini sa BRP Datu Pagbuaya, nga naka-eksperyensya sang water cannon fire kag sideswiping halin sa China Coast Guard (CCG).
Ang ikaduha nga sakayan sang PLA Navy wala ginreport nga nagapatigayon sang hilikuton, bangudsang distansya nga 7 nautical miles ang kalayuon gikan sa presensya sang isa ka sakayan sang PCG.
Ginpahayag ni National Maritime Council spokesman Undersecretary Alexander Lopez nga sa pihak sang mga probokasyon sang China, indi pagsundon sang Pilipinas ang ginhimo sang Beijing.
Nahibaluan nga ang pinakaulihi nga mga insidente natabo pagkatapos sang pagsumiter sang Beijing sang isa ka pahayag sa United Nations sa mga baseline sang iya teritoryal nga dagat, nga nagalakip sang isa ka tsart nga nagapakita sang Scarborough Shoal bilang kabahin sang ila teritoryal nga katubigan.
