Ginsaylo na ang Filipino death row inmate nga si Mary Jane Veloso sa Jakarta, Indonesia agud sugodan ang proseso sang iya pagpauli sa Pilipinas pagkatapos sang 14 ka tuig.
Suno kay Celia Veloso, iloy ni Mary Jane Veloso, gindala ang iya anak halin sa Yogjakarta sa isa ka pasilidad sa Jakarta sang Domingo. Amo ini ang rason kon ngaa ginkanselar ang pagbiyahe sang ila pamilya sa Indonesia nga dapat kuntani magbisita kay Mary Jane.
Natalana kuntani nga magpadulong sa Indonesia ang pamilya ni Veloso, ang iya abogado, kag pila ka mga opisyal sang gobyerno sa Domingo, Disyembre 15, agud bisitahon ini antes ang iya pagsaylo sa Pilipinas.
Suno kay Department of Foreign Affairs Undersecretary for Migrant Workers Affairs Eduardo de Vega, ginkanselar ang biyahe bangud wala na sang may matabo nga jail visit bangud ginasaylo na si Veloso halin sa Yogjakarta pakadto sa Jakarta para sa iya repatriation.
Si Mary Jane Veloso mahimo nga masaylo sa Pilipinas mga Disyembre 20, base sa report sang Agence France Presse.
Na-convict sa drug trafficking sang 2010, si Veloso yara na sa death row sa Indonesia sa sulod sang masobra isa ka dekada.
Bangud wala sang death penalty ang Pilipinas, nakadepende na kay President Ferdinand “Bongbong” Marcos kun hatagan siya sang pardon ukon i-commute ang iya sentensya sa life in prison.
Nag-apelar ang kampo ni Veloso kay Marcos nga hatagan siya sang clemency kasunod sang kasugtanan nga magatugot sa iya nga makapauli sa Pilipinas.
