Diretso nga dal-on sa Correctional Institution for Women (CIW) sa Mandaluyong City ang Filipino death row convict nga si Mary Jane Veloso sa tion nga mag-abot na ini sa Pilipinas.
Ini ang ginkumpirmar man ni Bureau of Corrections (BuCor) Director General Gregorio Catapang Jr.
Si Veloso, nga natalana nga i-repatriate sa Miyerkules sang aga matapos gin-detain sa Indonesia sa sulod sang 14 ka tuig, igabutang sa anay selda ni Cassandra Li Ong ang authorized representative sang gin-raid nga POGO hub sa Porac, Pampanga.
Ginpahayag ni Catapang nga nagpreparar sang adobong baboy kag pastillas ang Correctional Institution for Women sa Mandaluyong City para kay Veloso, sandig sa iya request.
Magapaidalum man ini sa quarantine sa una nga lima ka adlaw sa pag-abot kag magapaidalom sa orientation kag security evaluation sa masunod nga 55 ka adlaw antes i-detain sa regular nga selda.
Ginkumpirmar sang Department of Foreign Affairs (DFA) sang Lunes nga si Veloso magahimo sang iya homecoming sa husto nga tion para sa Paskwa. Ginalauman nga maga-abot ini sa Manila alas 6 sang aga sa Miyerkules, Disyembre 18.
Nag-abot man sa Indonesia ang mga opisyal sang Pilipinas sang Martes sang aga para sa iya turnover.
Na-convict sa drug trafficking sang 2010, si Veloso yara na sa death row sa Indonesia sa sulod sang masobra isa ka dekada..
Nag-apelar ang iya kampo kay President Ferdinand “Bongbong” Marcos nga hatagan siya sang clemency kasunod sang kasugtanan nga magatugot sa iya nga makapauli sa Pilipinas.
