Hingagawon sang Sangguniang Panlalawigan nga mapasar ang Appropriations Ordinance may kaangtanan paghatag sang gratuity pay para sa Job Order workers kag Contract of Service workers sang Iloilo Provincial Government.
Sa interview sang Bombo Radyo kay Board Member Domingo Oso, Jr., chairman sang Committee on Appropriations, iya ginpahayag nga may patigayunon sila nga special session sa Disyembre 23.
Suno kay Oso, sa tion nga mapasar ang ordinansa, mahingagaw ang pag-release sini antes ang Paskwa.
Pahayag ni Oso, kuhaon sa savings sang probinsya ang pondo nga para sa amo nga gratuity pay.
Nahibaluan nga subong nga tuig, makabaton sang tubtob P7,000 nga gratuity pay ang mga Job Order workers kag Contract of Service workers, nga mas mataas sa ila nabaton nga P5,000 sang 2023.
Nakadepende naman ang batunon nga gratuity pay sang workers sa kadugayon na sang iya serbisyo sa kapitolyo.
Kun ang worker ang employed sang masobra apat ka bulan, makabaton ini sang maximum nga P7,000.
Kun ang worker ang employed sang masobra tatlo ka bulan apang wala nakalab-ot sa apat ka bulan, makabaton ini sang maximum nga P6,000.
Kun nakalab-ot na sang duha ka bulan apang wala nakalab-ot sa tatlo ka bulan, makabaton ini sang P5,000.
Kun mas manubo sa duha ka bulan ang serbisyo, makabaton ini sang maximum nga P4,000.
