Maga-file sang resolution si Senate Minority Leader Aquilino Pimentel III agud ma-imbestigaran sa Senado ang bag-o lang ginpaguwa nga polymer banknotes kun sa diin ginpangkakas na ang imahe sang former presidents, mga baganihan, kag mga martir.
Suno kay Pimentel, madamo sang kinahanglan ipaathag ang Bangko Sentral ng Pilipinas (BSP) kaangot sa pag-desinyo sa bag-o nga banknotes sa baylo nga magtutok kuntani sila sa ila trabaho sa pagtapna sang inflation.
Gintawag sang senador nga buang-buang nga ideya ang pagpili sang “plastic” sa baylo sa “paper money” nga himo sa abaca kag cotton.
Sa iya igaduso nga resolution, ginalauman nga pangunahan sang Senate committee on banks, financial institutions and currencies ang pag-usisa sa amo nga isyu. Bukadon man kun pila ang gingasto para sa bag-o nga desinyo kag hibaluon kun ano ang resulta sang trial run sang una nga ginpaguwa ang P1,000 nga polymer notes sang 2022.
Sa bag-o nga gin-release nga polymer notes, ang Philippine Eagle kag sampaguita ang nakabutang sa P1000 bill; Visayan spotted deer kag Acanthephippium mantinianum sa P500 bill; Palawan peacock-pheasant kag Ceratocentron fesselii sa P100 note; kag Visayan leopard cat kag Vidal’s lanutan sa P50 note.
Buot silingon, lakip sa ginpangdula nga mga imahe amo ang ila sang tatlo ka World War II martyrs sa P1000 bill nga sanday Chief Justice Jose Abad Santos, Brig. Gen. Vicente Lim, kag suffragist kag Girl Scouts founder Josefa Llanes Escoda.
Wala naman sanday late former presidents Manuel Roxas kag Sergio Osmeña nga yara anay sa P100 kag P50 bill.
Ang ginakabig pinaka-kontrobersyal nga gindula nga imahe sa P500 polymer note amo ang ila nanday late president Corazon Aquino kag iya bana nga si anay Senador Ninoy Aquino. Ini nga mag-asawa ang makabig nga central figures sa pagtapos sang diktadurya ni anay President Ferdinand Marcos, Sr. nga amay ni President Bongbong Marcos, Jr.
