Buksan na sa publiko subong nga adlaw, Disyembre 23, ang kontrobersyal nga Ungka Flyover — duha ka adlaw nga mas temprano sa inisyal nga Disyembre 25 nga target sang Department of Public Works and Highways (DPWH) Region VI.
Ini nga reopening ang una nga ginkumpirma ni Iloilo City Traffic and Transportation Management Office head retired Police Colonel Uldarico Garbanzos sa Bombo Radyo Iloilo sang nagligad pa nga Biyernes, kag ginpasundan pa sang kumpirmasyon ni Mayor Jerry Treñas kahapon, Disyembre 23.
Pareho nga ginplastar sang duha ka mga opisyal ang komunikasyon nga ila nabaton gikan kay DPWH-Western Visayas regional director Engineer Sanny Boy Oropel.
Sa statement ni Mayor Treñas nga amo man ang chairperson sang Infrastructure Development Committee sang Regional Development Council VI, ginpahayag sini nga naka-request siya anay kay Director Oropel nga mas dasigon ang pagpabukas liwat sa flyover bangud mas pahalugon sini ang dalagan sang trapiko sa area kag mas mabuhinan ang huol sa commuters subong nga holiday season.
Bisan maagyan na ang flyover suno sa alkalde, magapadayon ang DPWH regional office sa pag-install sang steel railings sa parapet.
Bangud diri, naga-apelar ang alkalde sa mga motorista kag pedestrians nga maghalong kag sundon gid ang tanan nga traffic guidelines para sa safety sang tanan nga yara sa area.
“While the flyover will be accessible starting tomorrow (Dec 23), the DPWH will continue the installation of steel railings on the parapet. I appeal to motorists and pedestrians to remain cautious and follow all traffic guidelines for everyone’s safety. I thank the DPWH for heeding our request and working tirelessly to make this happen,” suno sa Dec. 22 Facebook post ni Treñas.
Sa interview naman sang Bombo Radyo kay Colonel Garbanzos, ginpahayag sini nga may short program lakip na ang simple nga ceremonial blessing nga himuon apang wala pa sang ginpatpat nga iban nga mga detalye.
Sa bahin sang ila opisina, ginpreparar ang mga personnel kag mga signages para mahibaluan sang publiko kun ano ang gina-dumilian.
Lakip sa indi pwede makalabay sa flyover amo ang dump trucks, transit mixers, wing vans, trailer trucks, mga motorsiklo, tricycles, kag mga bisekleta.
Ini nga reopening sang flyover nga halin sa Barangay Ungka, Jaro, Iloilo City padulong sa Barangay Ungka II, Pavia, Iloilo ang ginhimo sa tunga sang pila pa ka kahangawa sang publiko ilabi na sa gin-report nga nagakahulog nga mga debris nga nag-igu pa sa mga salakyan nga naglabay sa service road.
Sa joint committee hearing sang Sangguniang Panlalawigan sang nagligad nga Disyembre 17, ginpahayag ni DPWH-Western Visayas construction division chief Ormel Santos nga padayunon sang ila opisina ang jet grouting activities tubtub pa sa Enero 2025.#
