Indi na makahampang ang NorthPort Batang Pier player nga si John Amores sa Philippine Basketball Association (PBA) matapos ginbawi sang Games and Amusement Board (GAB) ang iya professional license.
Ginhimo ini nga tikang matapos napamatud-an nga guilty ang 25-anyos nga shooting guard sa “conduct unbecoming of a professional basketball player.”
Ini kasunod man sang imbestigasyon sa shooting incident sa Lumban, Laguna sang Septyembre kun sa diin involved ang nasambit nga basketball player. Siya ang ginatudlo nga nagpalupok sang iya nga pusil batok sa isa ka lalaki matapos ang isa ka basketball game. Gin-file na ang attempted homicide complaints batok sa iya kag sa iya utod apang pareho sila nga nakaguwa matapos nakapiyansa.
Antes ang desisyon sang GAB, nagpaguwa sang statement ang PBA nga nagdagdag sila sang one-conference suspension “without pay” batok kay Amores kag nag-require sa iya nga magkuha sang clearance halin sa counselors agud makahampang liwat.
Apang sa anum ka pahina nga desisyon sang GAB nga pirmado nanday chairman Francisco Rivera kag commissioners Manuel Plaza III kag Angel Bautista, indi na gid pwede nga makapasakop si Amores sa anuman nga professional basketball game nga sanctioned sang board lakip na ang PBA.
Matandaan nga nakilala man anay si Amores sa NCAA Season 98 matapos nga nag-amok sa hampang batok sa College of St. Benilde. Bangud sa iya pagpanapungol, ginsipa siya sa basketball program sang Jose Rizal University.
Sa preseason game sang 2022, na-involve man siya sa baisay batok kay Mark Belmonte sang University of the Philippines.
Apisar sini nga track record, ginkuha siya sang Batang Pier bilang 51st overall pick sa 2023 PBA Rookie Draft.
