Nagapati ka man bala sa halambalanon nga “Love is lovelier the second time around”?
Napamatud-an ini sang anay mag-asawa sa Pennsylvania, USA nga nag-diborsyo halos lima ka dekada na ang nagligad, apang nagpakasal liwat subong nga 2024.
Ini ang love story nanday Fay Shober, 89, kag si Robert Wenrich, 94.
Teenager pa lamang si Fay sang nakilala sini si Robert bangud nga ka-barkada ini sang iya magulang. Sang una pa lang, ginsiling na ni Robert nga pangasawahon sini si Fay kag natabo ini bangud sang November 10, 1951, nagpakasal sila kag nag-angkon sang mga bunga ang ila paghigugmaanay.
Ugaling, kaangay sa iban nga love stories, may mga pagpanghangkat man sa ila nga relasyon kag nagdesisyon sila nga magbulagay matapos ang 24 ka tuig nga pag-updanay bilang mag-asawa. Bisan may kabataan sila, nag-divorce sila sang 1975.
Pagkatapos sadto, nagpangasawa sila kag nagpamana sang lain… apang napatay ang second husband ni Fay sang 2022. 42 ka tuig man ang ila gin-updanay antes ini nabalo.
Sa pihak nga bahin, nagpakasal man anay si Robert kay Carol Shultz, apang nabalo man siya bangud napatay ang babaye 24 anyos na ang nagligad.
Samtang nagatigulang, naga-tabuay man gihapon ang banas nanday Robert kay Fay bangud pareho sila nga nagatambong sa family events.
Bangud maayo man ang ila nga relasyon, daw kaangay sila sang teenagers nga na-in love liwat sa isa kag isa. Bangud first love man ni Robert si Fay, wala na ini nag-uyang sang tiyempo kag ginpakaslan ini liwat sang nagligad lamang nga Disyembre 8.
Ginpahayag sang mag-asawa nga indi nila batasan nga balikan pa ang rason sang ila pagbulagay sang una bangud ang ila mindset subong amo nga i-enjoy kun ano ang yara sa ila pamilya.
Gina-enjoy nila ang pagkadto sa simbahan, pagtambong sa birthday parties sang ila mga apo, pagkadto sa casino, kag paghampang sang baraha sa ila nga balay.
Suno sa newlyweds, sang una anay, tuman sa ila nga sako sa pagpadako sang ila apat ka kabataan gani nga wala gid sila sang bebetime ukon husband-wife date nights. Bisan gani lantaw sang sine, indi nila mahimo sang una.
Pero subong, mas may time na sila nga mag-enjoy ilabi na bangud suportado sila sang ila kabataan kag ginapanginbulahan sila sang halos tanan nga nakakilala sa ila sa ila nga komunidad.
