Nag-donar ang BTS member nga si J-Hope sang 100 million Korean won (ginabanta $68,000 ukon P3.8 million) agud suportahan ang mga pamilya sang mga biktima sang nagtibusok ang eroplano sang Jeju Air sang nagligad nga Disyembre 29.
Ginhatag sang South Korean idol ang iya donasyon paagi sa Hope Bridge National Disaster Relief Association.
Antes sini, miyembro na nga daan si J-Hope sang Hope Bridge Honor Club nga grupo sang “high-value” donors nga nagasuporta sa nagkalain-lain nga kawsa kag nagahatag sang bulig sa mga nagakinahanglan.
Magluwas sa iya charitable efforts, gina-istoryahan man subong ang upcoming solo activities ni J-Hope matapos nakumpleto ang mandatory military service sang Oktubre 2024.
Balantayan ang “J-HOPE TOUR – HOPE ON THE STAGE” concert sa Seoul sa Feb. 28 tubtub March 2 subong nga tuig.
May full comeback man ang BTS sini nga 2025.
Kun matapos na ang ila military obligations, magabalik ang grupo sa global stage para sa celebratory world tour nga nagamarka sang ila 10th anniversary sang iconic nga “The Most Beautiful Moment in Life” series.
Sa subong, lima sa pito ka BTS members ang nagaserbe pa sa military nga amo sanday SUGA, RM, Jimin, V kag Jungkook apang natalana nga makatapos na sa mid-2025.
