Nagsungka na si Rufa Mae Quinto sa National Bureau of Investigation (NBI) kasunod sang arrest warrant nga gindagdag sang Pasay court batok sa iya bangud sa ginaalegar involvement sa investment scam nga naangot sa skin care company nga gin-flag na anay sang Securities and Exchange Commission (SEC).
Kahapon, sang nag-abot si Rufa Mae halin sa Los Angeles, California, USA, gin-detain siya sa Ninoy Aquino International Airport Terminal 1 paagi sa mga operatiba sang NBI-International Airport Investigation Division (IAID).
Suno sa NBI, gin-escort si Rufa pakadto sa Bureau of Immigration kag sunod nga gintugyan sa ila bangud sa alert list order nga naangot sa iya nga warrant of arrest.
Ginbasahan ini sang Miranda rights, pormal nga gin-aresto, kag sunod nga ginpaidalom sa booking procedures.
Base sa kampo sang aktres, ang iya abogado ang pormal nga nagpakig-angot sa NBI para sa voluntary surrender. Ginpaidalom man siya sa medico-legal examination antes gindala sa Pasay court.
Sa inisyal nga impormasyon, P1.7-million ang piyansa sang aktres para sa temporaryo nga kahilwayan.
Nagapangatubang siya sang 14 counts sang violation sang Section 8 sang Securities Regulation Code bangud sa kontrobersiya nga ginakaulamiran sang kumpaniya sang Dermacare.
Una na anay ginplastar ni Rufa nga biktima man siya sang sitwasyon.
Wala ini sang ginapangatubang nga large-scale estafa complaint bangud nangin endorser lamang siya sang kumpaniya kag wala nag-intra sa solicitation investments.
Ini man nga kumpaniya amo ang rason sa pagkadakop sa actress-entrepreneur nga si Neri Naig nga asawa ni Chito Miranda sang 2024 nga nag-endorso man sa produkto.
