Nagtakop sa draw, 3-3, ang hampang sang Philippine women’s team batok sa home team sang Uzbekistan sa 2025 Women’s Futsal Asian Cup Qualifiers.
Gina-uyatan na subong sang world no. 59 nga Filipinas ang 1-1-0 win-draw-loss card sa Group C samtang ang pihak nga team naman nga pang-18 sa world rankings ang may record nga 0-1-0.
Kuatro minutos pa lang sa pagsugod sang hampang, naka-skor na si Isabella Flanigan para sa Philippine team kag napasundan ni Katrina Guillou sa ika-16 nga minuto sang first half.
Dos minutos na lang ang nabilin sa hampang sang napalagyuhan sang beterana nga si Lyudmila Karachik ang tatlo ka defenders kag nahatagan ang host country sang 3-2 nga lead.
Apang wala diri nagpasugot ang Filipinas kag nagbalos paagi sa wala nga tiil ni Judy Connolly nga nakaluwas man sa defense sang Uzbekistan rason nga nag-draw sa 3-3 sang nagahingapos na ang oras.
Matandaan nga sa una nga hampang sang Filipinas sang Sabado, ginlutos sini ang Kuwait, 4-1.
Buwas, atubangon sang team ang Turkmenistan nga una na nalubong sa 6-1 blowout batok sa Australia.
